搬屋紙箱大解構：紙箱都有咁多種？點㨂好？

每一、兩年搬一次屋，每次都用新紙箱好似唔環保…所以有啲人搬屋果陣會用返啲舊紙箱，但係咪全部舊紙箱都用得？用舊紙箱會有咩問題出現？紙箱都有分種類？

絕大部份嘅紙箱都係由瓦楞纸去製成，好處就係有一定硬度、容易裁剪、成本較平、方便印刷及上色等。壞處就係表面較易被刮花、忌水、易發霉等。

一般紙箱分有4種類型，分別係E坑、單坑、雙坑同埋三坑。紙箱嘅每一面都係由「面紙」同「浪紙」黏合而成，浪紙嘅大細同層數就決定咗紙箱嘅厚度同硬度。E坑即係單層幼坑(約1.5mm厚)一般係用嚟做內層間隔用。而普通單坑嘅浪紙較粗(約3-5mm厚)，一般單坑紙箱已經可以用作搬屋同裝水果等。而雙坑故名思義就係有兩層浪紙(約6mm厚)，較單坑多一層浪紙，保護性更強，用作大型商品同需要防撞嘅物品。至於三坑即係有3層浪紙，一般情況下比較少見，可以用嚟搬五金等重物。

其實一般單坑或雙坑紙箱都可以用嚟搬屋，要留意嘅係每個箱嘅最高承重量係15-25kg，太重嘅話有機會令紙箱爆開，同時亦有機會整傷搬運者嘅腰骨。搬屋師傅會用板車將若干個紙箱砌好，然後再一車推走。如果紙箱硬度唔夠，又或者係用一D二手而且發霉/濕過水嘅紙箱做底，好大機會承受唔到重量而塌咗，上面其他箱都會有危險。所以揀二手紙箱時要睇吓佢哋夠唔夠企身、有冇濕過同發霉等。

想知道更多關於搬屋/搬office嘅資訊？記得訂閱我哋嘅newsletter。